ନୂଆଦିଲ୍ଲୀ : ଆମେରିକାରୁ ଦିଲ୍ଲୀ ଆସୁଥିବା ଏୟାର ଇଣ୍ଡିଆର ଏକ ଫ୍ଲାଇଟରେ ଚକିତ କଲା ଭଳି ଘଟଣା ସାମ୍ନାକୁ ଆସିଛି। ବିମାନରେ ନିଶାସକ୍ତ ଅବସ୍ଥାରେ ଜଣେ ଯାତ୍ରୀ ୭୦ ବର୍ଷୀୟା ମହିଳା ଯାତ୍ରୀଙ୍କ ଉପରେ ପରିସ୍ରା କରିଥିବା ଅଭିଯୋଗ ହୋଇଛି। ଏନେଇ ବୟୋବୃଦ୍ଧ ମହିଳା ଯାତ୍ରୀ ଜଣକ କ୍ୟାବିନ କର୍ମଚାରୀଙ୍କୁ ଜଣାଇଥିଲେ ମଧ୍ୟ ତାଙ୍କ ବିରୋଧରେ କୌଣସି କାର୍ଯ୍ୟାନୁଷ୍ଠାନ ହୋଇନଥିଲା । ପରେ ମହିଳା ଜଣକ ଏହି ଘଟଣା ସମ୍ପର୍କରେ ଟାଟା ଗ୍ରୁପ୍ର ଅଧ୍ୟକ୍ଷ ଏନ୍ ଚନ୍ଦ୍ରଶେଖରନଙ୍କୁ ଚିଠି ଲେଖିବା ପରେ ମାମଲାର ତଦନ୍ତ ଆରମ୍ଭ ହୋଇଛି ।
ଏୟାର ଇଣ୍ଡିଆ ସମ୍ପ୍ରତି ଏହି ଘଟଣାର ତଦନ୍ତ କରୁଛି। ବୟସ୍କା ମହିଳା ତାଙ୍କ ଚିଠିରେ ଅଭିଯୋଗ କରିଛନ୍ତି ଯେ କ୍ୟାବିନ କ୍ରୁ ତାଙ୍କ ସହ ଘଟିଥିବା ଏଭଳି ଯନ୍ତ୍ରଣାଦାୟକ ତଥା ସମ୍ବେଦନଶୀଳ ଘଟଣାର ମୁକାବିଲା ପାଇଁ କୌଣସି ତତ୍ପରତା ପ୍ରକାଶ କରିନଥିଲେ । ଏହି ଘଟଣାରେ ଏୟାରଲାଇନ ତାଙ୍କ ସୁରକ୍ଷା ଏବଂ ସୁବିଧା ପାଇଁ କୌଣସି ଉଦ୍ୟମ କରିନଥିଲା, ଯାହା ଦୁଃଖର କଥା ବୋଲି ମହିଳା ଜଣକ କହିଛନ୍ତି ।
ଗଣମାଧ୍ୟମ ରିପୋର୍ଟ ଅନୁଯାୟୀ, ଗତ ବର୍ଷ ନଭେମ୍ବର ୨୬ରେ ଏୟାର ଇଣ୍ଡିଆ ଫ୍ଲାଇଟ ଏଆଇ-୧୦୨ର ବିଜିନେସ୍ କ୍ଲାସରେ ଏହି ଘଟଣା ଘଟିଥିଲା। ଏହି ଫ୍ଲାଇଟ୍ ନ୍ୟୁୟର୍କର ଜେଏଫକେ ବିମାନବନ୍ଦରରୁ ଅପରାହ୍ନ ୨ଟାରେ ଦିଲ୍ଲୀ ଅଭିମୁଖେ ଉଡ଼ାଣ ଆରମ୍ଭ କରିଥିଲା | ମହିଳା ତାଙ୍କ ଚିଠିରେ ଲେଖିଛନ୍ତି ଯେ ମଧ୍ୟାହ୍ନ ଭୋଜନ ପରେ କିଛି ସମୟ ପରେ ଲାଇଟ୍ ବନ୍ଦ ହୋଇଯାଇଥିଲା। ଏହି ସମୟରେ ନିଶାସକ୍ତ ଅବସ୍ଥାରେ ଜଣେ ପୁରୁଷ ସହଯାତ୍ରୀ ମୋ ସିଟ୍ ଆଡ଼କୁ ଆସିଥିଲେ । ସେ ତାଙ୍କ ପ୍ୟାଣ୍ଟ୍ ଖୋଲି ମୋତେ ତାଙ୍କ ପ୍ରାଇଭେଟ୍ ପାର୍ଟ ଦେଖାଇଥିଲେ | ପରେ ସେ ମୋ ଉପରେ ପରିସ୍ରା କରିଥିଲେ । ପରେ ସେ ସେଠାରେ କିଛି ମିନିଟ୍ ଠିଆ ହୋଇ ରହିଥିଲେ ଏବଂ ଲଜ୍ଜାଜନକ ଭାବେ ତାଙ୍କର ପ୍ରାଇଭେଟ୍ ପାର୍ଟ ପ୍ରଦର୍ଶନ କରିଥିଲେ। ଯେତେବେଳେ ଜଣେ ସହଯାତ୍ରୀ ତାଙ୍କୁ ଯିବାକୁ କହିଥିଲେ, ସେ ଚାଲିଯାଇଥିଲେ |
ମହିଳା ଜଣକ କହିଛନ୍ତି, ସେ ତୁରନ୍ତ କ୍ୟାବିନ କ୍ରୁ ସଦସ୍ୟଙ୍କୁ ଏହି ଘଟଣା ସମ୍ପର୍କରେ ଜଣାଇଥିଲେ। ସେ ଲେଖିଛନ୍ତି ଯେ ମୋର ପୋଷାକ, ଜୋତା ଏବଂ ବ୍ୟାଗ ସଂପୂର୍ଣ୍ଣ ପରିସ୍ରାରେ ଭିଜି ଯାଇଥିଲା | ଜଣେ କ୍ୟାବିନ କ୍ରୁ ମୋ ସିଟକୁ ଆସି ପରିସ୍ରା ଗନ୍ଧ ବାରିପାରିଥିଲେ। କିନ୍ତୁ ସେ ମୋ ବ୍ୟାଗ୍ ଏବଂ ଜୋତାରେ ସେଣ୍ଟ ସ୍ପ୍ରେ କରି ଚାଲି ଯାଇଥିଲେ | ଫ୍ଲାଇଟ୍ ଦିଲ୍ଲୀରେ ପହଞ୍ଚିବା ପରେ ମଧ୍ୟ ଏୟାରଲାଇନ କର୍ତ୍ତୃପକ୍ଷ ଅଭିଯୁକ୍ତ ବ୍ୟକ୍ତିଙ୍କୁ ସହଜରେ ଛାଡ଼ି ଦେଇଥିଲେ ।ଏୟାର ଇଣ୍ଡିଆ ଏହି ମାମଲାର ତଦନ୍ତ ପାଇଁ ଏକ କମିଟି ଗଠନ କରିଛି । ଏହାଛଡ଼ା ଅଭିଯୁକ୍ତ ପୁରୁଷ ଯାତ୍ରୀଙ୍କୁ ‘ନୋ ଫ୍ଲାଏ ଲିଷ୍ଟ’ରଜ ରଖିବାକୁ ପ୍ରସ୍ତାବ ଦେଇଛି।
