କଲୋମ୍ବୋ : ଯୌନ ନିର୍ଯାତନା ଅଭିଯୋଗରେ ଗିରଫ ହେଲେ ଶ୍ରୀଲଙ୍କା ଖେଳାଳି ଦନୁସ୍କା ଗୁଣତିଳକ। ଏନେଇ ଟିମ୍ ପକ୍ଷରୁ ଗଣମାଧ୍ୟମକୁ ସୂଚନା ଦିଆଯାଇଛି। ଅଷ୍ଟ୍ରେଲିଆରେ ଖେଳାଯାଉଥିବା ଟି-୨୦ ବିଶ୍ୱକପ୍ରେ ଶ୍ଲୀଲଙ୍କା ଟିମ୍ରେ ସାମିଲ ଥିଲେ ଗୁଣତିଳକ। ସେ ଅଷ୍ଟ୍ରେଲିଆରେ ଥିବା ବେଳେ ସିଡନୀ ପୁଲିସ ତାଙ୍କୁ ଗିରଫ କରିଛି। ନଭେମ୍ବର ୨ ତାରିଖରେ ମହିଳାଙ୍କୁ ଯୌନ ନିର୍ଯାତନା ଅଭିଯୋଗରେ ତଦନ୍ତ କରୁଥିବା ସିଡନୀ ସିଟି ପୁଲିସ ରବିବାର ଭୋରରୁ ତାଙ୍କୁ ଗିରଫ କରି ଥାନାକୁ ନେଇଛି। ଦୁଷ୍କର୍ମ ଅଭିଯୋଗରେ ଦନୁସ୍କା ଗୁଣତିଳକାଙ୍କୁ ଗିରଫ କରାଯାଇଛି ବୋଲ୍ ଶ୍ରୀଲଙ୍କା ଟିମ୍ ଭାରତର ଖବର ସରବରାହ ସଂସ୍ଥା ପିଟିଆକୁ ସୂଚନା ଦେଇଛି। ଦନୁସ୍କାଙ୍କୁ ଛାଡ଼ି ଟିମ୍ ଶ୍ରୀଲଙ୍କା ଫେରିଯିବ ବୋଲି ମଧ୍ୟ ସୂଚନା ମିଳିଛି।
ଦନୁସ୍କାଙ୍କ ଗିରଫଦାରୀକୁ ନେଇ ସାଉଥ ୱେଲ୍ ପୁଲିସ ନିଜର ଅଫିସିଆଲ୍ ୱେବ୍ସାଇଟ୍ରେ ଉଲ୍ଲେଖ କରିଛି। ଯୌନ ନିର୍ଯାତନା ମାମଲାରେ ଜଣେ ଶ୍ରୀଲଙ୍କା ନାଗରିକ ଗିରଫ ହୋଇଛନ୍ତି ବୋଲି ୱେବ୍ସାଇଟ୍ରେ କୁହାଯାଇଛି। ରିପୋର୍ଟରେ କୁହାଯାଇଛି ଯେ ଗତ ସପ୍ତାହରେ ପୂର୍ବ ସିଡନୀରେ ଜଣେ ମହିଳାଙ୍କୁ ଦୁଷ୍କର୍ମ କରାଯାଇଥିବା ଅଭିଯୋଗ ହୋଇଥିଲା। ରୋସ୍ ବେରେ ଥିବା ଏକ ଘରେ ମହିଳାଙ୍କୁ ଦୁଷ୍କର୍ମ କରାଯାଇଥିଲା। ଏଥିରେ ପୁଲିସ ତଦନ୍ତ କରି ଶ୍ରୀଲଙ୍କା ନାଗରିକଙ୍କୁ ଧରିଛି।
ସୂଚନା ଯେ, ଗତକାଲି ଇଂଲଣ୍ଡ ଓ ଶ୍ରୀଲଙ୍କା ମଧ୍ୟରେ ଖେଳାଯାଉଥିବା ମ୍ୟାଚ୍ରେ ଶ୍ରୀଲଙ୍କା ପରାସ୍ତ ହୋଇଛି। ଏହି ପରାଜୟ ସହିତ ଦଳ ବିଶ୍ୱକପରୁ ବାଦ ପଡ଼ିଛି। ଟି-୨୦ ବିଶ୍ୱକପର ସୁପର-୧୨ ମୁକାବିଲାର ପ୍ରଥମ ରାଉଣ୍ଡରେ ଗୁଣତିଳକ ନାମ୍ବିଆ ବିପକ୍ଷରେ ମ୍ୟାଚ୍ ଖେଳି ଶୂନରେ ଆଉଟ ହୋଇଥିଲେ। ଏହାପରେ ଆହତ କାରଣରୁ ତାଙ୍କୁ ଟିମ୍ରୁ ବାଦ ଦିଆଯାଇଥିଲା। ଆଉ ଗତକାଲି ଇଂଲଣ୍ଡ ଠାରୁ ପରାଜୟ ପରେ ଟିମ୍ ବି ବିଶ୍ୱକପରୁ ବାଦ ପଡ଼ିଛି।
