ଟ୍ୟାଙ୍କ ବ୍ୟାରେଲ ବିସ୍ଫୋରଣ: ୨ ଯବାନ ମୃତ, ଜଣେ ଗୁରୁତର

ଝାନ୍ସି : ଝାନ୍ସିରେ ଟି-୯୦ ଟ୍ୟାଙ୍କର ବ୍ୟାରେଲ ବିସ୍ଫୋରଣ ହୋଇ ୨ ଜଣ ଭାରତୀୟ ସେନାର ଯବାନଙ୍କ ମୃତ୍ୟୁ ହୋଇଥିବା ବେଳେ ଜଣେ ଗୁରୁତର ଆହତ ହୋଇଥିବା ଜଣାପଡ଼ିଛି। ଗୁରୁବାର ଦିନ ଝାନ୍ସିର ବବିନା କ୍ୟାଣ୍ଟନମେଣ୍ଟ ଅଞ୍ଚଳରେ ସାମରୀକ ପ୍ରଶିକ୍ଷଣ ସମୟରେ ଏହି ଦୁର୍ଘଟଣା ଘଟିଥିଲା। ମୃତ୍ୟୁ ଘଟିଥିବା ୨ ଜଣ ଯବାନ ଜେସିଓ ରାଙ୍କର ଥିଲେ ବୋଲି ଜଣାପଡ଼ିଛି। ତେବେ କାହିଁକି ଏଭଳି ଘଟଣା ଘଟିଲା ତାହାର ତଦନ୍ତ ପାଇଁ କୋର୍ଟ ନିର୍ଦ୍ଦେଶ ଦେଇଛି।

ସୂଚନା ଅନୁସାରେ ଅକ୍ଟୋବର ୬ ତାରିଖରେ ବବିନା ଫିଲ୍ଡରେ ଆୟୋଜିତ ବାର୍ଷିକ ଉତ୍ସବରେ ଏହି ଟ୍ୟାଙ୍କ ଭାଗନେଇଥିଲା। ବିସ୍ଫୋରଣ ସମୟରେ ଟ୍ୟାଙ୍କରେ ୩ ଜଣ ଯବାନ ଉପସ୍ଥିତ ଥିଲେ। ବିସ୍ଫୋରଣ ପରେ ଘଟଣାସ୍ଥଳରୁ ସେମାନଙ୍କୁ ତୁରନ୍ତ ମେଡ଼ିକାଲ ସହାୟତା ପ୍ରଦାନ ସହିତ ହସ୍ପିଟାଲରେ ଭର୍ତ୍ତି କରାଯାଇଥିଲା।

ଏହି ଘଟଣାରେ ଉକ୍ତ ଟ୍ୟାଙ୍କର କମାଣ୍ଡର ଓ ଗନ ମ୍ୟାନ୍‌ ଅଧିକ ପୋଡିଜଳି ଯାଇଥିବାରୁ ତାଙ୍କର ଚିକିତ୍ସାଧୀନ ଅବସ୍ଥାରେ ମୃତ୍ୟୁ ହୋଇଛି। ସେହିପରି ଟ୍ୟାଙ୍କର ଡ୍ରାଇଭର ଅବସ୍ଥା ଏବେ ବିପଦମୁକ୍ତ ଥିବା ମେଡ଼ିକାଲ କର୍ତ୍ତୃପକ୍ଷ ସୂଚନା ଦେଇଛନ୍ତି। ଏନେଇ ଭାରତୀୟ ସେନା ତରଫରୁ ମୃତକଙ୍କ ପ୍ରତି ଶୋକପ୍ରକାଶ କରାଯାଇଛି।