ଭୋପାଳ: ରାଷ୍ଟ୍ରୀୟ ସ୍ଵୟଂସେବକ ସଂଘ (ଆରଏସ୍ଏସ୍)ର ଏକ କାର୍ଯ୍ୟକ୍ରମରେ ଦୁଇଜଣ ସରକାରୀ କର୍ମଚାରୀ ଯୋଗଦେବା ନେଇ ମଧ୍ୟ ପ୍ରଦେଶରେ ବଡ଼ ବିବାଦ ଉଠିଛି । ବିରୋଧୀ କଂଗ୍ରେସ ଉଭୟ ଅଧିକାରୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ଦାବି କରିଛି।
ରାଜ୍ୟରେ ବିଧାନସଭା ନିର୍ବାଚନକୁ ଆଉ ୬ ମାସ ଥିବା ବେଳେ ଏହି ଘଟଣାକୁ ନେଇ ଶାସକ ବିଜେପିକୁ ଟାର୍ଗେଟ କରିଛି କଂଗ୍ରେସ ।
ଜୁନ୍ ୧୧ରେ ସତନାରେ ଅନୁଷ୍ଠିତ ଆରଏସ୍ଏସ୍ କାର୍ଯ୍ୟକ୍ରମ (‘ସମର୍ପଣ ସମାରୋହ’) ର ଏକ ଭାଇରାଲ୍ ଫଟୋରେ ଦୁଇଜଣ ଆଇଏଏସ୍ ଅଧିକାରୀ ଜିଲ୍ଲା କଲେକ୍ଟର ଅନୁରାଗ ବର୍ମା ଓ ପୌର ନିଗମ କମିଶନର ରାଜେଶ ଶାହୀ ହାତ ଉଠାଇ ଆରଏସ୍ଏସ୍ ର ପାରମ୍ପରିକ ସଲାମୀ (ଧ୍ବଜ ପ୍ରଣାମ) କରୁଥିବା ଦେଖିବାକୁ ମିଳୁଛି ।
କଂଗ୍ରେସ ରାଜ୍ୟସଭା ସାଂସଦ ବିବେକ ତନଖା ଏହି ଘଟଣାର ଫଟୋ ଟୁଇଟ୍ କରି ଏକ ପୋଷ୍ଟରେ କହିଛନ୍ତି: “ଆରଏସ୍ଏସ୍ କାର୍ଯ୍ୟକ୍ରମରେ ଅଂଶଗ୍ରହଣ କରିଥିବା ଏବଂ ‘ଧ୍ବଜ ପ୍ରଣାମ’ କରୁଥିବା ଏହି ଦୁଇ ଅଧିକାରୀ ହେଲେ ଜିଲ୍ଲା ଅଧିକାରୀ ଅନୁରାଗ ବର୍ମା ଓ ନଗର କମିଶନର ରାଜେଶ ଶାହିଙ୍କ ଫଟୋ। ଏପରି ସମ୍ପର୍କରେ ରହିଥିବା ଅଧିକାରୀମାନେ କିପରି ମୁକ୍ତ ଏବଂ ନିରପେକ୍ଷ ନିର୍ବାଚନ କରିପାରିବେ? ”
ଭାରତର ନିର୍ବାଚନ ଆୟୋଗକୁ ଟ୍ୟାଗ୍ କରି ଏହି ଦୁଇ ଅଧିକାରୀଙ୍କୁ ନିର୍ବାଚନ ପ୍ରକ୍ରିୟାରୁ ହଟାଇବାକୁ ସେ ଦାବି କରିଛନ୍ତି । ଏହାଛଡ଼ା ସେମାନଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ରାଜ୍ୟ ମୁଖ୍ୟ ସଚିବ ଇକବାଲ ସିଂ ବୈନ୍ସଙ୍କୁ ଅନୁରୋଧ କରିଛନ୍ତି।
