ପାକିସ୍ତାନରେ ଖସି ପଡିଲା ଭାରତୀୟ ସେନାର ମାନବ ବିହୀନ ବିମାନ

ନୂଆଦିଲ୍ଲୀ : ଭାରତୀୟ ସେନାର ଏକ ଛୋଟ ମାନବ ବିହୀନ ବିମାନ (ୟୁଏଭି) ବୈଷୟିକ ତ୍ରୁଟି ଯୋଗୁ ଆଜି ପାକିସ୍ତାନ ଆକାଶମାର୍ଗରୁ ଖସି ପଡ଼ିଛି। ଭାରତୀୟ ସେନା ଏକ ବିବୃତ୍ତିରେ କହିଛି ଯେ ୟୁଏଭି ଏକ ପ୍ରଶିକ୍ଷଣ ମିଶନରେ ଥିବା ବେଳେ ଏହା ପାକିସ୍ତାନର ନିକିଆଲ ସେକ୍ଟରରେ ପ୍ରବେଶ କରିଥିଲା ଏବଂ ପରେ ପାକିସ୍ତାନୀ ସୈନିକମାନେ ଏହାକୁ ଉଦ୍ଧାର କରିଥିଲେ।

ଭାରତୀୟ ସେନା କହିଛି, ସକାଳ ୯ଟା ୨୫ ମିନିଟରେ ଭାରତୀୟ ସୀମା ଭିତରେ ପ୍ରଶିକ୍ଷଣ ମିଶନରେ ଥିବା ଏକ ମିନି ୟୁଏଭି ଯାନ୍ତ୍ରିକ ତ୍ରୁଟି ଯୋଗୁଁ ନିୟନ୍ତ୍ରଣ ହରାଇ ଭୀମବର ଗଲି ସେକ୍ଟର ସମ୍ମୁଖ ପାକିସ୍ତାନର ନିକିଆଲ ସେକ୍ଟରକୁ ଖସି ପଡ଼ିଥିଲା। ଭାରତ ପାକିସ୍ତାନ ସେନାକୁ ସେହି ୟୁଏଭି ଫେରାଇ ଦେବାକୁ କହିଛି। ଭାରତୀୟ ସେନା କହିଛି, ଉକ୍ତ ୟୁଏଭିକୁ ଫେରାଇ ଆଣିବା ପାଇଁ ପାକିସ୍ତାନ ସେନାକୁ ଏକ ହଟ୍ ଲାଇନ୍ ବାର୍ତ୍ତା ପଠାଯାଇଛି।

ଦୁଇ ଦିନ ପୂର୍ବରୁ ରାଜସ୍ଥାନର ଜୈସଲମେର ଜିଲ୍ଲାର ପୋଖରାନ ଫାୟାରିଂ ରେଞ୍ଜ ନିକଟରେ ଭାରତୀୟ ବାୟୁସେନାର ଏକ ବିମାନ ଯାନ୍ତ୍ରିକ ତ୍ରୁଟି ଯୋଗୁଁ ଭୁଲବଶତଃ ଏକ ‘ଏୟାର ଷ୍ଟୋର’ ଛାଡ଼ିଥିଲା। ଏୟାର ଷ୍ଟୋର ମୂଳତଃ ଏକ ଅଭ୍ୟାସ ବୋମା ଥିଲା ଯାହା ନିର୍ଦ୍ଧାରିତ ଶତ୍ରୁମାନଙ୍କୁ ଟାର୍ଗେଟ କରିବା ପାଇଁ ଅଭ୍ୟାସରେ ବ୍ୟବହୃତ ହେବା ପାଇଁ ଡିଜାଇନ୍ କରାଯାଇଥିଲା। ଅଗଷ୍ଟ ୨୧ ତାରିଖରେ ଘଟିଥିବା ଏହି ଘଟଣାର ତଦନ୍ତ ନିର୍ଦ୍ଦେଶ ଦିଆଯାଇଛି।