ମୁମ୍ବାଇ: ଘାଟକୋପର ହୋର୍ଡିଂ ଅଘଟଣ ମାମଲାର ମୁଖ୍ୟ ଅଭିଯୁକ୍ତ ଭବେଶ ଭିଣ୍ଡେଙ୍କୁ ଉଦୟପୁରରୁ ଗିରଫ କରାଯାଇଛି। ମୁମ୍ବାଇ ପୋଲିସ ରାଜସ୍ଥାନର ଉଦୟପୁରରୁ ଭବେଶ ଭିଣ୍ଡେଙ୍କୁ ଗିରଫ କରିଛି। ଘାଟକୋପରରେ ହୋର୍ଡିଂ ଭୁଶୁଡ଼ିବା ଘଟଣା ପରେ ସେ ଫେରାର ହୋଯାଇଥିଲେ। ମୁମ୍ବାଇ ପୋଲିସର ୯ଟି ଟିମ୍ ଭିଣ୍ଡେଙ୍କୁ ଧରିବା ଲାଗି ୭ଟି ରାଜ୍ୟରେ ଚଢ଼ାଉ କରିଥିଲା। ଆଜି ସକାଳେ ତାଙ୍କୁ ମୁମ୍ବାଇ ଅଣାଯାଇଛି । ଆଉ କିଛି ସମୟ ପରେ ତାଙ୍କୁ କୋର୍ଟରେ ହାଜର କରାଯିବ।
ଇଷ୍ଟ ଏକ୍ସପ୍ରେସୱେରେ ଘାଟକୋପରରେ ପେଟ୍ରୋଲ ପମ୍ପ ପାଖରେ ଭବେଶ ଭିଣ୍ଡେଙ୍କ ଇଗୋ ମିଡିଆ କମ୍ପାନୀ ଦ୍ୱାରା ଲଗାଯାଇଥିବା ଏକ ବିରାଟ ହୋର୍ଡିଂ ସୋମବାର ଝଡ଼ବର୍ଷାରେ ଭୁଶୁଡ଼ି ପଡ଼ିଥିଲା। ଏହି ଅଘଟଣରେ ୧୬ ଜଣ ଲୋକ ପ୍ରାଣ ହରାଇଥିଲେ ଏବଂ ୭୦ରୁ ଅଧିକ ଲୋକ ଆହତ ହୋଇଥିଲେ। ଏହି ହୋର୍ଡିଂ ଲଗାଇବା ପୂର୍ବରୁ ମୁମ୍ବାଇ ମହାନଗର ନିଗମ (ବିଏମସି)ର ଅନୁମତି ନିଆଯାଇନଥିଲା।
ଇଗୋ କମ୍ପାନୀର ମାଲିକ ଭବେଶ ଭିଣ୍ଡେଙ୍କ ସମେତ ଏହି କମ୍ପାନୀର ସମସ୍ତ ନିର୍ଦ୍ଦେଶକ, ଅଧିକାରୀ, କର୍ମଚାରୀ ଏବଂ କଣ୍ଟ୍ରାକ୍ଟରଙ୍କ ବିରୋଧରେ ମାମଲା ରୁଜୁ ହୋଇଛି। ଏହି ଘଟଣା ପରେ ଭିଣ୍ଡେ ମୋବାଇଲ୍ ଫୋନ୍ ବନ୍ଦ କରି ବାରମ୍ବାର ନିଜ ସ୍ଥାନ ବଦଳାଇଥିଲେ। ମୁମ୍ବାଇ କ୍ରାଇମ ବ୍ରାଞ୍ଚର ଟିମ୍ ରାଜସ୍ଥାନର ଉଦୟପୁରର ଏକ ହୋଟେଲରୁ ତାଙ୍କୁ ଗିରଫ କରିଥିଲା । ମୁମ୍ବାଇ ମ୍ୟୁନିସିପାଲିଟି କର୍ପୋରେସନ୍ ଆକ୍ଟ ଅନୁଯାୟୀ ତାଙ୍କ କମ୍ପାନୀ ବିରୋଧରେ ଅନେକ ମାମଲା ରୁଜୁ ହୋଇଛି। ଏହାଛଡ଼ା ତାଙ୍କ ବିରୋଧରେ ବଳାତ୍କାର ମାମଲା ସହ ଅନେକ ଅପରାଧିକ ମାମଲା ବି ରହିଛି । ଭିଣ୍ଡେ ମଧ୍ୟ ମୁଲୁଣ୍ଡ ଆସନରୁ ୨୦୦୯ ବିଧାନସଭା ନିର୍ବାଚନ ଲଢିଥିଲେ ।
