ଉତ୍ତରକାଶୀ: ଉତ୍ତରାଖଣ୍ଡର ଉତ୍ତରକାଶୀରେ ସିଲ୍କୟାରା ଟନେଲରେ ଫସି ରହିଥିବା ୪୧ ଜଣ ଶ୍ରମିକଙ୍କ ପ୍ରଥମ ଭିଡିଓ ମଙ୍ଗଳବାର ଜାରି କରାଯାଇଛି । ଟନେଲ୍ ଦେଇ ଏକ ୬ ଇଞ୍ଚ ଚଉଡା ପାଇପ୍ ଖଞ୍ଜା ଯାଇଛି। ଏହି ପାଇପ୍ ମାଧ୍ୟମରେ ଶ୍ରମିକମାନଙ୍କୁ ଖେଚୁଡ଼ି ଓ ପାଣି ପଠାଯାଇଥିଲା। ଏଥିରେ ଏକ କ୍ୟାମେରା ମଧ୍ୟ ଲଗାଯାଇଥିଲା, ଯାହା ଦ୍ବାରା ଭିତରେ ଫସି ରହିଥିବା ଶ୍ରମିକଙ୍କ ଭିଡ଼ିଓ ସାମ୍ନାକୁ ଆସିଛି | ଗତ ୧୦ ଦିନ ଧରି ଟନେଲରେ ଶ୍ରମିକମାନେ କେଉଁ ପରିସ୍ଥିତିରେ ରହୁଛନ୍ତି ତାହା ଦେଖିବାକୁ ମିଳିଛି |
ସୋମବାର ଉଦ୍ଧାର କାର୍ଯ୍ୟ ଦଳ ଟନେଲ ଭିତରେ ଏକ ୬ ଇଞ୍ଚର ପାଇପ୍ ପୂରାଇଥିଲେ, ଯାହା ମାଧ୍ୟମରେ ଶ୍ରମିକମାନଙ୍କୁ ଖାଦ୍ୟ ପଠାଯାଇଥିଲା। ଶ୍ରମିକମାନଙ୍କ ଅବସ୍ଥା ଏବଂ ସେମାନଙ୍କ ସ୍ୱାସ୍ଥ୍ୟ ଜାଣିବା ପାଇଁ ଏହି ପାଇପ୍ ମାଧ୍ୟମରେ ଏକ ଏଣ୍ଡୋସ୍କୋପିକ୍ ଫ୍ଲେକ୍ସି କ୍ୟାମେରା ମଧ୍ୟ ପଠାଯାଇଥିଲା ଯେଉଁଥିରେ ସମସ୍ତ ଶ୍ରମିକଙ୍କୁ ଦେଖିବାକୁ ମିଳିଛି | ଏହି ଦଳ ମଧ୍ୟ ୱାକି-ଟକି ମାଧ୍ୟମରେ ସେମାନଙ୍କ ସହ କଥା ହୋଇ ସେମାନଙ୍କୁ ଉତ୍ସାହିତ କରିଥିଲେ |
ଭିଡ଼ିଓରେ ଟନେଲରେ ଫସି ରହିଥିବା ସମସ୍ତ ଶ୍ରମିକ ଏକାଠି ଠିଆ ହୋଇଥିବା ଦେଖିବାକୁ ମିଳୁଛି । ଉଦ୍ଧାରକାରୀ ଶ୍ରମିକ ମାନଙ୍କୁ କ୍ୟାମେରାରେ ଲାଗିଥିବା ମାଇକ୍ ନିକଟରେ ଯାଇ କଥାବାର୍ତ୍ତା କରିବାକୁ କହିଥିଲେ | ଏହାଛଡ଼ା ସମସ୍ତ ଶ୍ରମିକଙ୍କୁ ସୁସ୍ଥ ଓ ସୁରକ୍ଷିତ ଦେଖିବା ଆଶ୍ବସ୍ତିକର ବିଷୟ।
ଟନେଲରେ ଫସି ରହିଥିବା ଶ୍ରମିକଙ୍କ ଉଦ୍ଧାର କାର୍ଯ୍ୟର ଆଜି ଦଶମ ଦିନ | ସୋମବାର ୬ ଇଞ୍ଚ ପାଇପ୍ ଯୋଗେ ଶ୍ରମିକ ମାନଙ୍କୁ ଖେଚୁଡ଼ି ଏବଂ ଡାଲି ସହ ଅନ୍ୟ ଖାଦ୍ୟ ସାମଗ୍ରୀ ସେମାନଙ୍କୁ ପଠାଯାଇଥିଲା। ଖେଚୁଡ଼ି ସହିତ କମଳା-ଆପଲ୍ ଏବଂ ଲେମ୍ବୁ ରସ ମଧ୍ୟ ପଠାଯାଇଥିଲା | ଶ୍ରମିକ ମାନଙ୍କ ସହ ନିରନ୍ତର ଯୋଗାଯୋଗ ପାଇଁ ମୋବାଇଲ୍ ଏବଂ ଚାର୍ଜର ମଧ୍ୟ ଏହି ପାଇପ୍ ମାଧ୍ୟମରେ ପଠାଯିବ |
ଅନ୍ୟପକ୍ଷରେ, ଏନଡିଆରଏଫ୍, ଏସଡିଆରଏଫ୍ ସହ ସମସ୍ତ ଏଜେନ୍ସି ଯୁଦ୍ଧକାଳୀନ ଭିତ୍ତିରେ ଉଦ୍ଧାର କାର୍ଯ୍ୟ ଜାରି ରଖିଛନ୍ତି। ଶ୍ରମିକମାନଙ୍କୁ ଟନେଲରୁ ବାହାର କରିବା ପାଇଁ ସମସ୍ତ ବିକଳ୍ପ ଉପରେ କାମ କରାଯାଉଛି | ସୋମବାର ବିଦେଶରୁ ଆସିଥିବା ଜଣେ ଟନେଲ ବିଶେଷଜ୍ଞ ମଧ୍ୟ ଏଠାରେ ପହଞ୍ଚି ଉଦ୍ଧାରକାରୀ ଦଳ ସହ ରଣନୀତି ଉପରେ ଆଲୋଚନା କରିଛନ୍ତି | ଟନେଲ ଉପର ଭାଗରେ ଭୂଲମ୍ବ ଡ୍ରିଲିଂ ମାଧ୍ୟମରେ ଏକ ରାସ୍ତା ତିଆରି କରିବାକୁ ଚେଷ୍ଟା କରାଯାଉଛି।
