ନୂଆଦିଲ୍ଲୀ : କଂଗ୍ରେସ ସଭାପତି ନିର୍ବାଚନରେ ହେବ ଗୁପ୍ତ ଭୋଟିଂ । କିଏ କେଉଁ ପ୍ରାର୍ଥୀଙ୍କୁ ଭୋଟ୍ ଦେଲେ ଏବଂ କେଉଁ ରାଜ୍ୟରୁ କାହାକୁ ଅଧିକ ଭୋଟ୍ ମିଳିଛି ତାହା ଜାଣିହେବ ନାହିଁ। କଂଗ୍ରେସର କେନ୍ଦ୍ରୀୟ ନିର୍ବାଚନ ପ୍ରାଧିକରଣ ମୁଖ୍ୟ ମଧୁସୂଦନ ମିସ୍ତ୍ରି ଏହି ସୂଚନା ଦେଇଛନ୍ତି । ସେ କହିଛନ୍ତି ଯେ ଉଭୟ ପ୍ରାର୍ଥୀଙ୍କ ପାଇଁ ସମାନ ସୁଯୋଗ ସୁନିଶ୍ଚିତ କରିବା ପାଇଁ ନିର୍ବାଚନ କର୍ତ୍ତୃପକ୍ଷ ସମସ୍ତ ପ୍ରକାର ଉଦ୍ୟମ କରିଛନ୍ତି। ଅକ୍ଟୋବର ୧୭ରେ କଂଗ୍ରେସ ସଭାପତି ପଦ ପାଇଁ ମତଦାନ ହେବ ଏବଂ ଅକ୍ଟୋବର ୧୯ରେ ଫଳାଫଳ ଘୋଷଣା କରାଯିବ। କଂଗ୍ରେସ ସଭାପତି ପଦ ପାଇଁ ମଲ୍ଲିକାର୍ଜୁନ୍ ଖଡଗେ ଏବଂ ଶଶି ଥରୁରଙ୍କ ମଧ୍ୟରେ ଲଢେଇ ହେବ ।
ଏକ ସାମ୍ବାଦିକ ସମ୍ମିଳନୀରେ ମିସ୍ତ୍ରି ଭୋଟ୍ ଦେବାର ସମ୍ପୂର୍ଣ୍ଣ ପ୍ରକ୍ରିୟା ଏବଂ ବିଧି ବ୍ୟବସ୍ଥା ବିଷୟରେ ସୂଚନା ଦେଇଛନ୍ତି । ଏହାଛଡ଼ା ସେ ଏହି ନିର୍ବାଚନରେ ବ୍ୟବହାର ହେବାକୁ ଥିବା ବାଲାଟ୍ ବକ୍ସ ଏବଂ ବାଲାଟ୍ ପେପର୍ ମଧ୍ୟ ଦେଖାଇଥିଲେ | ମିସ୍ତ୍ରି ଆହୁରି କହିଛନ୍ତି ଯେ ମତଦାନ ପରେ ପ୍ରାର୍ଥୀଙ୍କ ଏଜେଣ୍ଟଙ୍କ ଉପସ୍ଥିତିରେ ବାଲାଟ ବକ୍ସକୁ ସିଲ୍ କରାଯିବ। ତା’ପରେ ସମ୍ପୃକ୍ତ ରାଜ୍ୟର ରିଟର୍ଣ୍ଣିଂ ଅଧିକାରୀମାନେ ଏହି ବକ୍ସଗୁଡ଼ିକ ସହିତ କଂଗ୍ରେସ ମୁଖ୍ୟାଳୟରେ ପହଞ୍ଚିବେ। ଭୋଟ୍ ଗଣତି ପୂର୍ବରୁ ପ୍ରାର୍ଥୀଙ୍କ ଉପସ୍ଥିତିରେ ବାଲାଟ୍ ବକ୍ସ ସିଲ୍ ଖୋଲାଯିବ ଏବଂ ସମସ୍ତ ବାଲାଟ୍ ପେପର ମିଳାଯିବ ବୋଲି ସେ କହିଛନ୍ତି।
ତାଙ୍କ କହିବାନୁସାରେ, ବାଲାଟ ବକ୍ସ ରଖିବା ପାଇଁ କଂଗ୍ରେସ ମୁଖ୍ୟାଳୟରେ ହିଁ ଏକ ଷ୍ଟ୍ରଙ୍ଗ ରୁମ୍ ତିଆରି କରାଯାଇଛି । ଏକ ପ୍ରଶ୍ନର ଉତ୍ତରରେ ସେ କହିଛନ୍ତି ଯେ ଏହି ନିର୍ବାଚନ ସମ୍ପୂର୍ଣ୍ଣ ଗୋପନୀୟ ହେବ। କାହାକୁ କିଏ ଭୋଟ୍ ଦେଇଛନ୍ତି ଏବଂ ଜଣେ ପ୍ରାର୍ଥୀ କେଉଁ ରାଜ୍ୟରୁ କେତେ ଭୋଟ୍ ପାଇଛନ୍ତି ତାହା କେହି ଜାଣି ପାରିବେ ନାହିଁ। ”
ମିସ୍ତ୍ରି କହିଛନ୍ତି ଯେ ନିର୍ବାଚନ ପ୍ରକ୍ରିୟା ସମ୍ପର୍କରେ ଏକ ଅଭିଯୋଗ ଆସିଥିଲା ଯାହାର ସମାଧାନ ହୋଇଛି। ନିର୍ବାଚନ ଗୁପ୍ତ ବାଲାଟ୍ ଦ୍ୱାରା ଅନୁଷ୍ଠିତ ହେବା ନେଇ କେନ୍ଦ୍ରୀୟ ନିର୍ବାଚନ ପ୍ରାଧିକରଣ ମୁଖ୍ୟ ମଧୁସୂଦନ ମିସ୍ତ୍ରି ଏକ ସାର୍ବଜନୀନ ସ୍ପଷ୍ଟୀକରଣ ଦିଅନ୍ତୁ ବୋଲି କିଛି ଦିନ ତଳେ ଶଶି ଥରୁର ଦାବି କରିଥିଲେ । ସେ କହିଥିଲେ ଯେ ଦିଲ୍ଲୀରେ ପ୍ରାର୍ଥୀ ଏବଂ ସେମାନଙ୍କ ଏଜେଣ୍ଟଙ୍କ ସମ୍ମୁଖରେ ସିଲ୍ ହୋଇଥିବା ବାଲାଟ୍ ବାକ୍ସ ଖୋଲାଯିବା ଦରକାର ଏବଂ ଭୋଟ୍ ଗଣତି ଆରମ୍ଭ ହେବା ପୂର୍ବରୁ ସମସ୍ତ ବାଲଟ୍ ପେପର୍ ମିଶ୍ରଣ କରାଯିବା ଉଚିତ |
