ଥିରୁବନନ୍ତପୁରମ୍ : ଆଜି ଭାରତ ଓ ଶ୍ରୀଲଙ୍କା ମଧ୍ୟରେ ତୃତୀୟ ତଥା ଅନ୍ତିମ ଦିନିକିଆ । ରବିବାର ଥିରୁବନନ୍ତପୁରମ୍ଏ ହି ମ୍ୟାଚ ଖେଳାଯିବ । ପ୍ରଥମ ଦୁଇଟି ମ୍ୟାଚ ଜିତି ୨-୦ରେ ଅଗ୍ରଣୀ ରହିଥିବା ଭାରତ ସିରିଜ୍ କ୍ଲିନ୍ ସୁଇପ୍ ଲକ୍ଷ୍ୟରେ ରହିଛି । ଅଧିନାୟକ ରୋହିତ ଶର୍ମା ବ୍ୟାଟିଂ ଲାଇନ୍ ଅପରେ ଚାହିଁବେନି କିନ୍ତୁ କିଛି ବୋଲିଂ ବିକଳ୍ପ ପ୍ରୟୋଗ କରିବାକୁ ଚେଷ୍ଟା କରିପାରନ୍ତି। ଗୁଆହାଟୀରେ ସହଜ ବିଜୟ ପରେ କୋଲକାତାରେ ଏକ ସାଧାରଣ ଲକ୍ଷ୍ୟର ପିଛା କରିବାକୁ ଯାଇ ଭାରତ ଟପ୍ ଅର୍ଡର ବିପର୍ଯ୍ୟୟର ସମ୍ମୁଖୀନ ହୋଇଥିଲା । କିନ୍ତୁ ଶେଷରେ ୪ ଓ୍ବିକେଟ୍ ବିଜୟ ସହ ସିରିଜରେ ୨-୦ରେ ଅପରାଜେୟ ଅଗ୍ରଣୀ ହାସଲ କରିବାକୁ ସମର୍ଥ ହୋଇଥିଲା। ଏହି ସିରିଜର ଶେଷ ମ୍ୟାଚରେ ମଧ୍ୟ ଭାରତ ଜୟଯାତ୍ରା ଜାରି ରଖିବାକୁ ଲକ୍ଷ୍ୟ ରଖିବ ।
ଏହି ମ୍ୟାଚର ୭୨ ଘଣ୍ଟାରୁ କମ୍ ସମୟ ମଧ୍ୟରେ ଦଳ ଅପେକ୍ଷାକୃତ ଶକ୍ତିଶାଳୀ ପ୍ରତିଦ୍ୱନ୍ଦ୍ୱୀ ନ୍ୟୁଜିଲାଣ୍ଡକୁ ଆଉ ୬ ମ୍ୟାଚ୍ ବିଶିଷ୍ଟ ଧଳାବଲ୍ ସିରିଜରେ ଭେଟିବ । ଶ୍ରୀଲଙ୍କା ବିପକ୍ଷ ଏହି ସିରିଜରେ ୩-୦ କ୍ଲିନ୍ ସୁଇପ୍ ସହିତ ଖେଳାଳିମାନେ ଆଗାମୀ ସିରିଜ୍ ପାଇଁ ମାନସିକ ସ୍ତରରେ ପ୍ରସ୍ତୁତ ହେବାକୁ ଚାହିଁବେ । କାର୍ଯ୍ୟଭାର ପରିଚାଳନାର ଲାଭ ଥାଇପାରେ କିନ୍ତୁ ଏଥିରେ କିଛି ସମସ୍ୟା ମଧ୍ୟ ଅଛି । ଉଦାହରଣ ସ୍ୱରୂପ ଜଣେ ଖେଳାଳିଙ୍କୁ ମଝିରେ ବିଶ୍ରାମ ଦେବା ଦ୍ବାରା ସେ ତାଙ୍କ ଲୟ ହରାଇ ପାରନ୍ତି । ବୋଧହୁଏ ଏହି କାରଣ ଯୋଗୁଁ ଭାରତୀୟ ଅଧିନାୟକ ଗତ ମ୍ୟାଚରେ ଇଶାନ୍ କିଶନ କିମ୍ବା ସୂର୍ଯ୍ୟକୁମାର ଯାଦବଙ୍କୁ ନ ଖେଳାଇବାକୁ ନିଷ୍ପତ୍ତି ନେଇଥିଲେ । ବୋଲର ଅନୁକୂଳ ଗ୍ରୀନଫିଲ୍ଡ ଷ୍ଟାଡିୟମରେ ଶ୍ରୀଲଙ୍କା ଆକ୍ରମଣ ବିରୋଧରେ ସମସ୍ତ ଶ୍ରେଷ୍ଠ ପାଞ୍ଚଜଣ ବ୍ୟାଟ୍ସମ୍ୟାନ୍ ଅଧିକ ବ୍ୟାଟିଂ କରିବାକୁ ଚାହିଁବେ, ଯେଉଁଥିରେ ଅଲରାଉଣ୍ଡର ହାର୍ଦ୍ଦିକ ପାଣ୍ଡ୍ୟା ମଧ୍ୟ ସାମିଲ ଅଛନ୍ତି। ତେଣୁ ବୋଲିଂ ଲାଇନ୍ ଅପରେ କିଛି ପରିବର୍ତ୍ତନ ହୋଇପାରେ |
୧୪ ଦିନ ମଧ୍ୟରେ ଭାରତ ୬ଟି ୫୦ ଓଭର ମ୍ୟାଚ୍ (ଶ୍ରୀଲଙ୍କା ବିପକ୍ଷରେ ତିନୋଟି ଏବଂ ନ୍ୟୁଜିଲାଣ୍ଡ ବିପକ୍ଷରେ) ଖେଳିବାକୁ ଥିବା ବେଳେ ମହମ୍ମଦ ଶାମିଙ୍କ କାର୍ଯ୍ୟଭାର ଭାରତୀୟ ଟିମ୍ ମ୍ୟାନେଜମେଣ୍ଟ ପାଇଁ ଏକ ବଡ଼ ଚିନ୍ତାର କାରଣ ହେବ। ଯଶପ୍ରୀତ ବୁମରାଙ୍କ ଅନୁପସ୍ଥିତିରେ ବର୍ଡର-ଗାଭାସ୍କର ଟ୍ରଫିରେ ଶାମି ଭାରତୀୟ ବୋଲିଂ ଆକ୍ରମଣର ନେତୃତ୍ୱ ନେବେ ବୋଲି ଆଶା କରାଯାଉଛି । ତେଣୁ ତାଙ୍କର କାର୍ଯ୍ୟ ଭାର ଉପରେ ଅଧିକ ଧ୍ୟାନ ଦିଆଯିବା ଆବଶ୍ୟକ । ଯଦି ସେ ଫିଟ୍ ରୁହନ୍ତି, ତେବେ ସେ ଏହି ଚାରିଟି ଟେଷ୍ଟରେ ପ୍ରାୟ ୧୨୫ ରୁ ୧୩୦ ଓଭର ବୋଲିଂ କରିବେ ବୋଲି ଆଶା କରାଯାଉଛି । ବାମହାତୀ ଦ୍ରୁତ ବୋଲର ଅର୍ଶଦୀପ ସିଂଙ୍କୁ ବିଭିନ୍ନ ଫର୍ମାଟରେ ସୁଯୋଗ ଦିଆଯାଇପାରେ, କାରଣ ତାଙ୍କୁ ମଧ୍ୟ କିଛି ‘ଗେମ୍ ଟାଇମ୍’ ଆବଶ୍ୟକ କରନ୍ତି । ଯଦି ୱିକେଟ୍ ଅନୁକୂଳ ରହେ ତେବେ ଅର୍ଶଦୀପ ସଫଳ ହୋଇପାରନ୍ତି। ଗତ ମ୍ୟାଚରେ ୟୁଜବେନ୍ଦ୍ର ଚହଲଙ୍କ (କାନ୍ଧରେ ଆଘାତ)ଙ୍କ ସ୍ଥାନରେ ଖେଳି କୁଲଦୀପ ଯାଦବ ପୁଣି ମ୍ୟାନ୍ ଅଫ୍ ଦି ମ୍ୟାଚ୍ ହୋଇଥିଲେ। ଯଦି ଚହଲ ଫିଟ୍ ଅଛନ୍ତି ତେବେ ଅଧିନାୟକ ତଥା ମୁଖ୍ୟ କୋଚ୍ ରାହୁଲ ଦ୍ରାବିଡ କ’ଣ କରିବେ ତାହା ଦେଖିବା ମଜାଦାର ହେବ। ବ୍ୟକ୍ତିଗତ କାରଣରୁ ନ୍ୟୁଜିଲାଣ୍ଡ ସିରିଜରୁ ଅକ୍ଷର ପଟେଲ ଏକ ବିଶ୍ରାମ ନେବେ । ଯଦି ଏହି ସିରିଜ୍ ପୂର୍ବରୁ ଦଳ ୱାଶିଂଟନ୍ ସୁନ୍ଦରଙ୍କୁ ଖେଳାଇବାକୁ ଚାହୁଁଛି, ତେବେ ତୃତୀୟ ଦିନିକିଆ ଏକ ଉପଯୁକ୍ତ ପ୍ଲାଟଫର୍ମ ହେବ । ବ୍ୟାଟିଂ ବିଭାଗରେ ଶୁଭମାନ ଗିଲ ମଧ୍ୟ ନିଜର ଭଲ ଫର୍ମ ଜାରି ରଖିବାକୁ ଚାହିଁବେ, କାରଣ ସେ ଜାଣନ୍ତି ଯେ ଇନିଂସ ଓପନ୍ କରିବା ପାଇଁ କିଶନ ତାଙ୍କର ଜଣେ ବଡ଼ ବିକଳ୍ପ ଭାବେ ଅପେକ୍ଷା କରିଛନ୍ତି ।
ଅନ୍ୟପକ୍ଷରେ ଶ୍ରୀଲଙ୍କା ତୃତୀୟ ଦିନିକିଆ ଜିତି ସିରିଜ୍ କ୍ଲିନ୍ ସୁଇପ୍ ଏଡାଇବାକୁ ଚାହିଁବ । କୋଲକାତାରେ ଡେବ୍ୟୁରେ ଅର୍ଦ୍ଧଶତକ ହାସଲ କରିଥିବା ଓପନର୍ ନୁଆନିନ୍ଦୁ ଫର୍ନାଣ୍ଡୋଙ୍କ ରୂପରେ ଦଳକୁ ଆଉ ଏକ ପ୍ରତିଭାବାନ ବ୍ୟାଟ୍ସମ୍ୟାନ୍ ମିଳିଛି, ଯାହା ଦଳ ପାଇଁ ଭଲ ସଙ୍କେତ ।
