ଭଣ୍ଡାରିପୋଖରୀ: ଭଣ୍ଡାରିପୋଖରୀ ଥାନା ଅନ୍ତର୍ଗତ ୧୬ନଂ ଜାତୀୟ ରାଜପଥର ଚକବନ୍ଦୀ ଅଫିସ ଛକ ସମ୍ମୁଖରେ ବଡ ଧରଣର ଦୁର୍ଘଟଣା ଘଟିଛି। ରାସ୍ତା ଅତିକ୍ରମ କରିବାକୁ ଉଦ୍ୟମ କରୁଥିବା ଏକ ବାଇକକୁ ଅନ୍ୟ ଏକ ଦ୍ରୁତଗାମୀ ବାଇକ୍ ପଛରୁ ପିଟିବା ଫଳରେ ଦୁଇଟି ଯାକ ବାଇକ୍ ରାସ୍ତା ଉପରେ ଜଳି ପୋଡି ପାଉଁଶ ହୋଇଯାଇଛି। ଶବିନାର ଦିନ ପ୍ରାୟ ୧୨ଟା ୩୦ରେ ଦୁର୍ଘଟଣା ସ୍ଥାନର ଅନତି ଦୂରରେ ଥିବା ପେଟ୍ରୋଲ ପମ୍ପରୁ ସିଡି ଡିଲକ୍ସ ବାଇକ୍ ପେଟ୍ରୋଲ ଭରି ଭଣ୍ଡାରିପୋଖରୀ ଆଡକୁ ଆସୁଥିଲା। ଭଦ୍ରକ ଆଡୁ ଦ୍ରୁତ ବେଗରେ ଆସୁଥିବା ବିଏମଡବ୍ଲ୍ୟୁ ରାଇଡର ବାଇକ୍ ପଛରୁ ଧକ୍କା ଦେଇଥିଲା। ଫଳରେ ଦୁଇଟି ଯାକ ହୁତୁ ହୁତୁ ହୋଇ ଜଳିଥିଲା। ଦମକଳବାହିନୀ ପହଞ୍ଚି ନିଆଁ ଆୟତ୍ତ କରିବା ବେଳକୁ ଦୁଇଟି ଯାକ ବାଇକ୍ ସମ୍ପୂର୍ଣ୍ଣ ଜଳି ସାରିଥିଲା। ତେଣୁ ସିଡି ଡିଲକ୍ସ ବାଇକର ନମ୍ବର ଜଣାପଡିନଥିବାବେଳେ ବାଇକ୍ ଚାଳକ ଓ ଅନ୍ୟ ଜଣେ ଆରୋହୀ ଘଟଣାସ୍ଥଳରୁ ଚମ୍ପଟ ମାରିଥିଲେ । ହେଲେ ଚାଳକ ବାଇକ ଆରୋହୀ ବାଲେଶ୍ବର ନୂଆ ବଜାର ଅଞ୍ଚଳର ସମୀର କୁମାର ରାୟ ନିଆଁରେ ପୋଡି ହୋଇ ଗୁରୁତର ହୋଇଛନ୍ତି। ତାଙ୍କୁ କଟକ ଏସସିବି ସ୍ଥାନାନ୍ତର କରାଯାଇଛି।
