ନୂଆଦିଲ୍ଲୀ : ବାଂଲାଦେଶ ବିପକ୍ଷ ଦ୍ୱିତୀୟ ଟେଷ୍ଟରେ ୩୫ ବଲରେ ୪୭ ରନ କରିଥିବା ବିରାଟ କୋହଲି ନୂଆ ରେକର୍ଡ କରିଛନ୍ତି। ସେ ବିଶ୍ୱର ଦ୍ରୁତତମ ବ୍ୟାଟର ଭାବେ ଅନ୍ତର୍ଜାତୀୟ କ୍ରିକେଟରେ ୨୭ ହଜାର ରନ ପୂରଣ କରିବାକୁ ସକ୍ଷମ ହୋଇଛନ୍ତି। ପ୍ରଥମ ଟେଷ୍ଟରେ ଯଥାକ୍ରମେ ୬ ଓ ୧୭ ରନ କରିଥିବା ବିରାଟ ଆଜି ୩୫ ରନ କରିବା କ୍ଷଣି ନୂଆ ରେକର୍ଡର ଅଧିକାରୀ ହୋଇଥିଲେ। ଏହାପରେ ସେ ଆଉ ୧୨ ରନ କରି ସାକିବ ଅଲ ହାସନଙ୍କ ବଲରେ କ୍ଲିନବୋଲ୍ଡ ହୋଇଯାଇଥିଲେ।
ବିରାଟ ଦ୍ରୁତତମ ତଥା ବିଶ୍ୱର ୪ର୍ଥ ବ୍ୟାଟର ଭାବେ ଅନ୍ତର୍ଜାତୀୟ କ୍ରିକେଟରେ ୨୭ ହଜାର ରନ କରିଛନ୍ତି। ସେ କିମ୍ବଦନ୍ତୀ କ୍ରିକେଟର ସଚିନ ତେନ୍ଦୁଲକରଙ୍କୁ ମଧ୍ୟ ପଛରେ ପକାଇ ଦେଇଛନ୍ତି। ସଚିନ ୬୨୩ଟି ଇନିଂସ ଖେଳିବା ପରେ ଅନ୍ତର୍ଜାତୀୟ କ୍ରିକେଟରେ ୨୭ ହଜାର ରନ କରିପାରିଥିଲେ। କିନ୍ତୁ ବିରାଟ ୫୯୪ଟି ଇନିଂସରେ ଏପରି ରେକର୍ଡର ଅଧିକାରୀ ହୋଇଛନ୍ତି। ସଚିନ ଓ ବିରାଟଙ୍କ ବ୍ୟତୀତ କୁମାର ସାଙ୍ଗାକାର ୬୪୮ଟି ଇନିଂସ ଓ ରିକି ପଣ୍ଟିଂ ୬୫୦ଟି ଇନିଂସରେ ୨୭ ହଜାର ରନ ହାସଲ କରିଥିଲେ। ଅନ୍ୟପକ୍ଷରେ ସଚିନ ତେନ୍ଦୁଲକର ଅନ୍ତର୍ଜାତୀୟ କ୍ରିକେଟରେ ମୋଟ ୭୮୨ଟି ଇନିଂସରେ ୩୪,୩୫୭ ରନ କରିଥିବା ବେଳେ ତାଙ୍କ ପଛକୁ ସାଙ୍ଗାକାରା ୬୬୬ ଇନିଂସରେ ୨୮,୦୧୬ ରନ, ୬୬୮ ଇନିଂସରେ ରିକି ପଣ୍ଟିଂ ୨୭,୪୮୩ ରନ, ବିରାଟ କୋହଲି ୫୯୪ ଇନିଯସରେ ୧୭,୦୧୨ ରନ, ମାହେଲା ଜୟବର୍ଦ୍ଧନେ ୭୨୫ ଇନିଂସରେ ୨୫,୮୫୭ ରନ କରିଛନ୍ତି।
